Toshkent dunyo reytingida 128 pog‘onaga ko‘tarildi: poytaxtning qaysi ko‘rsatkichlari ortda qolmoqda?

Poytaxt iqtisodiyot yo‘nalishida bir yil ichida 558-o‘rindan 188-o‘ringa ko‘tarilgan. Inson kapitali bo‘yicha esa 108-o‘rinni egallagan. Bu ko‘rsatkich 2024-yilda 136-o‘rin, 2025-yilda 123-o‘rinni tashkil etgan.

Orqada qolingan boshqa ko‘rsatkichlar

Toshkent shahri hokimligi iqtisodiyot va inson kapitali bo‘yicha erishilgan natijalarni alohida ta’kidlagan bo‘lsa-da, reytingning qolgan uch yo‘nalishidagi ko‘rsatkichlarni keltirmagan. Xususan, Toshkent hayot sifati bo‘yicha 644-o‘rinni, atrof-muhit yo‘nalishida 806-o‘rinni, boshqaruv bo‘yicha esa 825-o‘rinni egallagan.

Taqqoslash uchun, qo‘shni Qirg‘iziston poytaxti Bishkek umumiy reytingda 461-o‘rinda joylashgan. Toshkent iqtisodiyot va inson kapitali bo‘yicha Bishkekdan yuqorida turgan bo‘lsa-da, ekologik ko‘rsatkichlarda buning aksi kuzatiladi. Bishkek atrof-muhit yo‘nalishida 671-o‘rinni egallagan. Bu Toshkentdan 135 pog‘ona yuqori. Hayot sifati va boshqaruv bo‘yicha esa Toshkentning ko‘rsatkichlari Bishkeknikidan biroz yaxshiroq.

Oxford Economics tahlilida Toshkentning zaif tomonlari sifatida haroratdagi me’yordan og‘ishlar, zararli gazlar chiqarilishi intensivligining yuqoriligi va uy-joy xarajatlarining kattaligi qayd etilgan. Shuningdek, ekologik xavflar va suv resurslariga bog‘liqlik shaharning kelgusidagi rivojlanishiga ta’sir qilishi mumkinligi ko‘rsatilgan.

Toshkent rivojlanishi kuzatib boriladigan shaharlar qatoriga kiritildi

Shu bilan birga, Oxford Economics Toshkentni “Cities to Watch” — rivojlanishini kuzatib borish lozim bo‘lgan shaharlar ro‘yxatiga kiritgan. Tadqiqotda poytaxtning iqtisodiy o‘sishi, malakali kadrlar salohiyati, texnologiyalar va investitsiyalarni jalb qilish imkoniyatlariga e’tibor qaratilgan.

Kompaniya prognoziga ko‘ra, 2026–2030-yillarda Toshkent iqtisodiyoti har yili o‘rtacha 7 foizdan ortiq o‘sishi kutilmoqda. Tahlilchilar shahar iqtisodiyotining rivojlanishida IT Park, Yangi Toshkent loyihasi, qurilish sohasi va xalqaro logistika imkoniyatlarini muhim omillar sifatida ko‘rsatgan.

Toshkent shahri hokimligi ham reyting natijalariga munosabat bildirar ekan, iqtisodiy o‘sish aholining kundalik hayotida sezilishi kerakligini ta’kidlagan. Hokimlik shahar muhiti sifati, toza havo va har bir tumanda qulay yashash sharoitlarini yaratish borasida hali ko‘p ishlar amalga oshirilishi kerakligini tan olgan.

Shunday qilib, Global Cities Index 2026 natijalari Toshkentning iqtisodiyot va inson kapitali bo‘yicha xalqaro reytingdagi o‘rni yaxshilanayotganini ko‘rsatmoqda. Ayni paytda ekologiya, hayot sifati va boshqaruv yo‘nalishlaridagi ko‘rsatkichlar poytaxt rivojlanishida e’tibor talab qiladigan masalalar ham mavjudligini ko‘rsatadi.