Toshkent yo‘llarida svetoforlar sinxronlashtirilib, tirbandliklar jilovlanmoqda
Tizim O‘zbekiston davlat jahon tillari universiteti oldidagi piyodalar o‘tish joyidan to Shayx Zayniddin ko‘chasi kesishmasi hamda “Visol” to‘yxonasi qarshisidagi piyodalar o‘tish joyigacha bo‘lgan masofada ishga tushirildi. Ushbu hudud joylashgan 12 ta svetofor obyekti yagona tizimga bog‘landi va haydovchilar tavsiya etilgan 50–60 km/soat tezlikda harakatlanganda chorrahalarda to‘xtamasdan o‘tish imkoniga ega bo‘ldi.
Tahlillarga ko‘ra, ilgari ushbu 5 kilometrlik yo‘lni bosib o‘tish uchun 11 daqiqa 30 soniya sarflangan bo‘lsa, yangi tizim yo‘lga qo‘yilgach, bu ko‘rsatkich 9 daqiqa 40 soniyagacha tushdi. Ya’ni har bir haydovchi mazkur yo‘l qismida o‘rtacha 1 daqiqa 50 soniya vaqtini tejashga erishmoqda.
Loyiha svetoforlardagi majburiy to‘xtashlar sonini kamaytirish, transport oqimini tartibga solish va tirbandliklarning oldini olishga qaratilgan. Mutasaddilar poytaxtning transport qatnovi yuqori bo‘lgan boshqa asosiy ko‘chalarida ham “Yashil to‘lqin” tizimini bosqichma-bosqich tatbiq etishni rejalashtirgan.
