Toshkent osmonida Xitoy raketasi ko‘ringani aytilmoqda
Ijtimoiy tarmoqlarda keng tarqalgan video va fotomateriallarni o‘rgangan o‘zbekistonlik ekspertlar jismning harakatlanish tezligi va tashqi izi tabiiy meteor yoki bolid hodisalariga umuman mos kelmasligini bildirishdi. Astronomlarning dastlabki xulosalariga ko‘ra, kuzatilgan noma’lum obyekt ko‘proq sun’iy yo‘ldoshlarni koinotga olib chiqqan tashuvchi raketaning ishlatib bo‘lingan qismiga o‘xshaydi.
Tahlillarga ko‘ra, mazkur hodisa Xitoyning “Tayyuan” kosmodromidan uchirilgan va PIESAT-2 seriyasidagi to‘rtta apparatni orbitaga olib chiqqan Long March-2D raketasining birinchi bosqichi bilan bog‘liqligi eng asosiy taxmin sifatida ko‘rilmoqda. Traektoriya hamda vaqtlar o‘rtasidagi moslik ushbu taxminni qisman tasdiqlaydi.
“Dastlabki orbital hisob-kitoblar uchirish vaqti, raketaning orbitasi hamda Toshkent osmonida hodisa kuzatilgan vaqt va yo‘nalish o‘rtasida juda yaxshi moslik mavjudligini ko‘rsatmoqda. Shu sababli hozirgi bosqichda eng ehtimoliy tushuntirish – Toshkent osmonida kuzatilgan hodisa ushbu kosmik uchirishning raketa bosqichi yoki undan keyingi orbital jarayonlardan biri bilan bog‘liq bo‘lishi mumkin”, deydi Astronomiya instituti katta ilmiy xodimi Kamoliddin Ergashev.
Biroq, mutaxassislar ushbu holatni yuz foiz qat’iy tasdiqlash uchun xalqaro kataloglarda yangi koinot obyektlariga oid orbital ma’lumotlar to‘liq yangilanishi zarurligini va bu bo‘yicha o‘rganishlar davom etayotganini qo‘shimcha qilishdi.
