Toshkent metrosi vagon parkining 70 foizi yangilanib, poyezdlar harakat oralig‘i Chilonzor yo‘nalishida 1,5 daqiqagacha qisqartirildi
Transport vazirligi bergan ma’lumotlarga ko‘ra, ushbu xaridlar evaziga poyezdlar parkining qariyb 70 foizi zamonaviy tarkiblarga almashtirildi. Yangi poyezdlar keng sig‘imi hamda yozgi sovitish va qishki isitish tizimlari bilan jihozlangani bilan ajralib turadi va hozirda metroning barcha to‘rtta yo‘nalishida xizmat ko‘rsatmoqda.
Yangi harakat tarkiblarining yo‘lga qo‘yilishi, ayniqsa tig‘iz vaqtlarda yo‘lovchilar kutish vaqtini sezilarli darajada kamaytirish imkonini berdi. Ayni paytda poyezdlar Chilonzor yo‘nalishida 1,5-2 daqiqa, O‘zbekiston yo‘nalishida 3 daqiqa, Yunusobod yo‘nalishida 4 daqiqa va Yer usti halqa yo‘lida 7–8 daqiqa oralig‘ida harakatlanmoqda.
Shuningdek, bekatlarda tirbandlikning oldini olish maqsadida tig‘iz soatlarda qo‘shimcha zaxira poyezdlari ajratilib, yo‘lovchilar oqimi gavjum bekatlarga bo‘sh tarkiblar yuborilmoqda. Tizimda kunlik yo‘lovchilar soni ham rekord darajaga yetib, masalan, 23-sentyabr kuni metrodan 1,1 milliondan ortiq kishi foydalangan.
