Toshkent markazidagi yettita yirik davlat binosi auktsionda sotildi
Sotilgan obyektlar ro‘yxatidan Transport vazirligi, Sport vazirligi, Qurilish va uy-joy kommunal xo‘jaligi vazirligi, Avtomobil yo‘llari qo‘mitasi, Ipakchilik va jun sanoatini rivojlantirish qo‘mitasi, Davlat xizmatlari agentligi hamda Turizm qo‘mitasi huzuridagi DUK binolari o‘rin olgan. Hozirda umumiy boshlang‘ich qiymati 1 trillion 95,8 milliard so‘mni tashkil etuvchi yana 11 ta obyekt savdoga qo‘yilgan bo‘lib, 20 ta ko‘chmas mulk bo‘yicha sotuvoldi tayyorgarlik jarayonlari ketmoqda.
Mazkur jarayonlar Hukumatning 2025-yil 7-martdagi 146-sonli qarori ijrosi doirasida tashkil etilmoqda. Hujjatga ko‘ra, 150 ta davlat organi va muassasasini Yangi Toshkent hududiga ko‘chirish hamda ularning poytaxt markazidagi 83 ta ko‘chmas mulk obyektini ochiq e-auksion savdolariga chiqarish belgilangan.
Hozirgi kunga qadar ushbu 83 ta davlat aktivining 7 tasi to‘liq sotilgan bo‘lsa, yana 31 tasi bosqichma-bosqich savdo jarayonlariga tayyorlanmoqda. Davlat aktivlarini boshqarish agentligining ma’lum qilishicha, ma’muriy binolarni sotishdan tushgan barcha mablag‘lar Yangi Toshkent hududida zamonaviy infratuzilma obyektlarini barpo etishga yo‘naltiriladi.
