Toshkent maktablarida o‘quvchilar davomati kameralar orqali nazorat qilinadi
Toshkentdagi maktablarda Face ID yordamida o‘quvchilarning davomati smart-kameralar orqali nazorat qilinishi yo‘lga qo‘yiladi. Bu haqda Toshkent shahar hokimligi xabar berdi.
Qayd etilishicha, hozirda “SI Davomat” tizimi Sergeli tumanidagi 26 ta maktabda sinovdan o‘tkazilmoqda. Ularda jami 446 ta smart-kamera o‘rnatilgan bo‘lib, tizim o‘quvchilarning maktabga kelishi va darslarda qatnashishini avtomatik qayd etadi. O‘quvchi uzrsiz dars qoldirsa, ota-onasiga SMS yuboriladi, ma’lumot tegishli mas’ullarga ham yetkaziladi.
Tizim “ERP Maktab” va Sog‘liqni saqlash vazirligining DMED tizimi bilan integratsiya qilingan. Bu kasallik sabab dars qoldirgan o‘quvchilarni uzrsiz dars qoldirganlardan ajratish imkonini beradi. Sinov natijalariga ko‘ra, tizimni Toshkentning boshqa maktablarida ham bosqichma-bosqich joriy etish rejalashtirilgan.
