Toshkent avtobuslarida chiptasiz yurgan 14 mingdan ortiq yo‘lovchiga ma’muriy bayonnoma rasmiylashtirildi
Transport vazirligi ma’lumotlariga ko‘ra, 2026-yilning 1–22-sentyabr kunlari oralig‘ida Toshkent shahri avtobuslarida yo‘l haqini to‘lamagan 14 051 nafar yo‘lovchi aniqlanib, ularga nisbatan ma’muriy bayonnomalar tuzildi. Ushbu ko‘rsatkich avgust oyiga nisbatan 8 494 nafarga yoki 153 foizga ko‘pdir.
Bunga Hukumatning joriy yil 3-iyundagi 276-sonli qarori bilan belgilangan yangi tartib sabab bo‘ldi. Unga ko‘ra, 1-sentyabrdan e’tiboran brutto-shartnoma asosida harakatlanadigan avtobuslarda yo‘lovchilar salonga kirish vaqtidayoq to‘lovni amalga oshirishlari shart. Aks holda, yo‘lovchi rasman chiptasiz harakatlangan deb hisoblanadi.
Tizimda tartibni ta’minlash va nazoratni kuchaytirish maqsadida “Toshkent shahar yo‘lovchi tashishni monitoring va nazorat qilish” davlat muassasasi nazoratchilari yo‘nalishlarda muntazam reyd va tushuntirish ishlarini olib bormoqda.
Shu bilan birga, poytaxtda umumiy yo‘lovchilar oqimi ham sezilarli darajada oshgan. Sentyabrning dastlabki 22 kunida avtobuslardan 27,8 milliondan ortiq kishi foydalangan bo‘lib, bu ko‘rsatkich o‘tgan yilning mos davriga nisbatan 15 foizga, avgust oyiga nisbatan esa 34 foizga ko‘pdir.
