Tojikistonda Rog‘un suv ombori bo‘ylab 50 kilometrdan ziyod yangi avtomobil yo‘li barpo etiladi
Uch yilga mo‘ljallangan ushbu loyihani amalga oshirish bo‘yicha shartnoma “Tojikgidroelektromontaj” OAJ bilan imzolangan.
Yangi yo‘lning 40,8 kilometri asosiy magistral trassadan, qolgan 10,6 kilometri esa tutashuvchi kirish yo‘llaridan iborat bo‘ladi. Loyihaning rasmiy buyurtmachisi “Rog‘un GES suv bosish zonasi direksiyasi” davlat korxonasi bo‘lib, uni moliyalashtirish Osiyo infratuzilmaviy investitsiyalar banki tomonidan ta’minlanadi.
Ushbu transport infratuzilmasi suv ombori atrofidagi aholi punktlari o‘rtasida qatnovni yaxshilash va hududning ijtimoiy-iqtisodiy rivojlanishiga xizmat qilishi ko‘zda tutilgan.
“Tojikgidroelektromontaj” OAJ matbuot xizmati xabariga ko‘ra, yangi yo‘l yaqin joylashgan qishloqlar aholisining ijtimoiy hamda iqtisodiy obyektlarga xavfsiz va tezkor borishini ta’minlashda muhim o‘rin tutadi.
Bundan avvalroq Rog‘un GES to‘g‘onining balandligi 190 metrga yetgani haqida xabarlar berilgan edi.
