Soxta ayblov bilan Janubiy Koreyada umrbod qamalgan o‘zbekistonlik 16 yildan so‘ng ozodlikka chiqarildi

Mazkur ish 2009-yil mart oyida Changvon shahrida taksi haydovchisining o‘ldirilishi voqeasiga borib taqaladi. O‘shanda 19 yoshda bo‘lgan Akmal Bozorov boshqa bir hodisa sababli ushlanib, keyinchalik ushbu qotillikda asosiy gumondorga aylantirilgan. U ko‘rsatmalari politsiyaning shafqatsizligi, qiynoqlari va aldovlari ostida olinganini bildirishiga qaramay, 2010-yilda unga nisbatan umrbod qamoq jazosi kuchda qoldirilgan.

Olib borilgan qayta o‘rganishlar natijasida o‘sha vaqtdagi politsiya xodimlari o‘z vakolatlarini suiiste’mol qilgani va jiddiy qonunbuzarliklarga yo‘l qo‘ygani tasdiqlandi. Jumladan, tergovchilar doimiy aldov va bosim ishlatgani, shuningdek, u koreys tilini yetarlicha bilmasligiga qaramay, ataylab tarjimon ajratmagani aniqlandi.

Advokat tomonidan taqdim etilgan yangi dalillar, jumladan, politsiya hisobotlaridagi soxtalashtirishlar hamda taksi ko‘rsatkichlaridagi tafovutlar sababli Changvon sudi noqonuniy tergov harakatlarini tan olib, ijtimoiy rezonans keltirib chiqargan ushbu ishni qayta ko‘rib chiqishga qaror qildi. Odil sudlov jarayonlari davom etayotgan bir paytda, Bozorov doimiy qamoqdan ozod etildi.