Shahvoniy shilqimlik uchun jarimalar miqdori keskin oshirilib, 10 sutkagacha qamoq jazosi belgilandi
2026-yil 14-oktyabrda imzolangan yangi qonun bilan Ma’muriy javobgarlik to‘g‘risidagi kodeksning 41¹-moddasiga tegishli o‘zgartirishlar kiritildi.
Yangi tartibga ko‘ra, shaxsning sha’ni va qadr-qimmatini kamsituvchi nomaqbul shahvoniy harakatlar, jumladan qaddi-qomatni shahvoniy ta’riflash, teginishlar yoki imo-ishoralar uchun jarima miqdori bazaviy hisoblash miqdorining 10 baravaridan 15 baravarigacha oshirildi.
Shuningdek, ushbu huquqbuzarlik uchun 10 sutkagacha ma’muriy qamoq jazosi qo‘llanilishi mumkin. Ilgari bu qilmish uchun 2–5 BHM jarima yoki 5 sutkagacha qamoq nazarda tutilgan edi.
Agarda ushbu ma’muriy jazo qo‘llanilganidan so‘ng bir yil davomida huquqbuzarlik takroran sodir etilsa, BHMning 15 baravaridan 20 baravarigacha miqdorda jarima solinadi yoki 15 sutkagacha ma’muriy qamoq tayinlanadi. Ma’lumot uchun, 2026-yil 1-sentyabrdan e’tiboran mamlakatda bazaviy hisoblash miqdori 440 ming so‘mni tashkil etadi.
Ushbu huquqiy o‘zgarishlar bolalarni zo‘ravonlikning barcha shakllaridan himoya qilish tizimini takomillashtirishga qaratilgan qonunchilik islohotlari doirasida qabul qilindi. Hujjat voyaga yetmaganlarga nisbatan sodir etiladigan boshqa huquqbuzarliklar uchun ham javobgarlikni kuchaytirib, ularning huquqiy himoyasini mustahkamlaydi.
