Sariosiyoda Qizil kitobga kiritilgan Tyan-Shan ayig‘i hamda yovvoyi to‘ng‘izlarni ovlagan shaxslarga nisbatan jinoyat ishi qo‘zg‘atildi
Ekologik reyd davomida ushlangan brakonerlar hayvonot dunyosiga 679 million 800 ming so‘m miqdorida juda ko‘p miqdorda zarar yetkazgan.
Noqonuniy ov holati Samarqand va Surxondaryo viloyatlari Ekologiya boshqarmalari xodimlarining hamkorlikdagi tezkor tadbirida fosh etilgan. Hujjatlarni tekshirish uchun to‘xtatilgan “Niva Legend” rusumli avtomobilning yukxonasidan qoplarga joylangan ayiq va to‘ng‘izlarning tana bo‘laklari, shuningdek, to‘liq o‘qlangan bir necha turdagi ov qurollari topilgan.
Ko‘zdan kechirish jarayonida avtotransport vositasidan 100 dan ortiq turli kalibrli jangovar va sochmali o‘q-dorilar, ovoz pasaytiruvchi moslamalar, binokllar, pichoq hamda o‘tkir tig‘li qurollar ashyoviy dalil sifatida olingan. Barcha ov qurollari, hujjatlar hamda transport vositasi belgilangan tartibda ichki ishlar organlariga topshirilib, jarima maydonchasiga joylashtirilgan.
Mazkur holat yuzasidan Jinoyat kodeksining 202-moddasi 3-qismi (Atrof-muhitga juda ko‘p miqdorda zarar yetkazgan holda tegishli ruxsatnomasiz hayvonlarni ovlash) bilan jinoyat ishi qo‘zg‘atilib, tergov harakatlari olib borilmoqda.
