Samarqandga keluvchilar diqqatiga! Shaharga kirish 5 kunga cheklanmoqda
Bu haqda Ichki ishlar vazirligi rasmiy ma’lumot berdi.
Keltirilishicha, 19-20-oktyabr kunlari Samarqandda Markaziy Osiyo mamlakatlari tashqi ishlar vazirlarining “C5+1” formati doirasidagi uchrashuvi, 21–22-oktyabr kunlari esa bolalar farovonligiga bag‘ishlangan global sammit bo‘lib o‘tadi. Ushbu nufuzli anjumanlarda dunyoning 100 dan ortiq mamlakatidan delegatsiyalar qatnashishi kutilmoqda.
Xavfsizlikni ta’minlash maqsadida Ibn Sino, Bo‘stonsaroy, Registon, Afrosiyob, Shohi Zinda, Mirzo Ulug‘bek hamda Beruniy kabi umumiy hisobda 16 ta ko‘chada harakat vaqtincha cheklanadi. Cheklovlar davrida haydovchilar uchun muqobil aylanma yo‘llar tashkil etilib, tranzit transport vositalari ham ushbu yo‘nalishlarga yo‘naltiriladi.
Soatli cheklovlar tez yordam hamda favqulodda xizmatlar avtomobillariga daxl qilmaydi. Yo‘l harakati xavfsizligi xizmati fuqarolardan ushbu vaqtinchalik noqulayliklarni to‘g‘ri tushunishni va mas’ul xodimlarning ko‘rsatmalari bo‘yicha harakatlanishni so‘ragan.
