Rossiya O‘zbekiston va boshqa qator davlatlarga 1 million rubldan ortiq naqd pul olib chiqishni taqiqladi
Kiritilgan yangi cheklovlarga muvofiq, jismoniy shaxslar O‘zbekiston, Tojikiston, Ozarbayjon hamda Yevrosiyo iqtisodiy ittifoqiga a’zo davlatlarga (Armaniston, Belarus, Qozog‘iston, Qirg‘iziston) 1 million rubldan ortiq naqd pul olib chiqa olmaydi. Belgilangan me’yordan oshgan mablag‘ chegarada olib qo‘yiladi.
Yuridik shaxslar hamda yakka tartibdagi tadbirkorlar uchun esa naqd rublni mamlakatdan olib chiqish miqdoridan qat’i nazar to‘liq taqiqlandi va qoidabuzarlik holatida barcha naqd pul musodara qilinadi. Faqat diplomatik vakolatxonalar, xalqaro yuk tashuvchi kompaniyalar va bankdan yechilganini tasdiqlovchi hujjatga ega bo‘lgan maxsus aeroport yo‘lovchilarigagina ayrim istisnolar berilgan.
“The Moscow Times” xabariga ko‘ra, ushbu yangi tartib 29-sentyabrdan e’tiboran kuchga kirdi. Shu tariqa, 2026-yilning 1-aprelidan buyon amal qilib kelgan va YEII mamlakatlariga 100 ming AQSh dollarigacha bo‘lgan ekvivalentda naqd rubl olib chiqishga ruxsat beruvchi avvalgi tartib o‘z kuchini yo‘qotdi.
