Qashqadaryoda Qizil kitobga kiritilgan baliqlarni ovlagan shaxs tabiatga 62 million so‘mdan ortiq zarar yetkazdi
Viloyat Ekologiya boshqarmasining Ekopolitsiya xodimlari hamda Kasbi tumani inspektorlari hamkorligida Mirishkor hududida navbatdagi nazorat-reyd tadbiri o‘tkazildi. Reyd davomida Bo‘ston mahallasidagi kollektorda fuqaro Sh.B. rezina qayiq hamda qo‘llanishi taqiqlangan leskali to‘rlar yordamida noqonuniy baliq ovlayotgan vaqtida to‘xtatib qolindi.
Xolislar ishtirokida ko‘zdan kechirilganda, fuqaro tomonidan 5 dona noyob Turkiston mo‘ylovdori, 11 dona zog‘ora, shuningdek, bittadan laqqa va kumushtovon baliqlari ovlangani ma’lum bo‘ldi. Huquqbuzarlik natijasida hayvonot dunyosiga yetkazilgan umumiy zarar miqdori 62 million 480 ming so‘mni tashkil etdi.
Olib borilgan surishtiruv jarayonida 1 dona rezina qayiq, 2 dona eshkak, 4 dona leskali to‘r va noqonuniy tutilgan baliqlar ashyoviy dalil sifatida musodara qilindi. Hozirda holatga huquqiy baho berish va javobgarlik masalasini hal etish uchun to‘plangan materiallar huquqni muhofaza qiluvchi organlarga topshirildi.
