Paxta terimida majburiy va bolalar mehnatiga yo‘l qo‘ymaslik bo‘yicha doimiy nazorat shtabi ish boshladi
Kambag‘allikni qisqartirish va bandlik vazirligi hamda Davlat mehnat inspeksiyasi ishchi guruhlari terimchilarning huquqlarini muntazam monitoring qilib bormoqda. Nazorat jarayonida mehnat munosabatlarining qonuniy rasmiylashtirilishi, ish va dam olish tartibiga amal qilinishi hamda terim pulining o‘z vaqtida to‘lanishi alohida e’tiborga olingan.
Davlat mehnat inspeksiyasi ish beruvchilar hamda fermer xo‘jaliklariga fuqarolarni majburiy mehnatga jalb qilmaslik bo‘yicha qat’iy ogohlantirish berdi. Shuningdek, ota-onalarga maktab o‘quvchilarining ta’lim olishiga xalaqit bermaslik va ularni paxta maydonlariga chiqarmaslik bo‘yicha tavsiyalar berilgan.
Mehnat huquqlari buzilgan yoki majburiy mehnat holatlariga duch kelgan fuqarolar uchun “1176” qisqa raqami hamda @munosibmehnat_bot Telegram-boti orqali tezkor murojaat qilish imkoniyati yaratilgan.
