O‘zbekistonga olib kirilayotgan yengil mashinalarning qariyb 70 foizini elektromobillar tashkil etmoqda
Yetti oy davomida O‘zbekiston xorijning 29 ta davlatidan jami 65 876 dona yengil avtomobil xarid qilgan. Olib kirilgan avtomobillarning mutlaq ko‘pchiligini – 46 749 donasini elektromobillar tashkil etib, ular mahalliy avtomobil bozorida ichki yonuv dvigatelli mashinalardan ustunlik qilayotganini ko‘rsatdi.
Import tarkibida ikkinchi o‘rinni 10 987 dona natija bilan benzinli avtomobillar egalladi. Shuningdek, ushbu davrda 8 077 dona gibrid vositalari hamda 63 dona boshqa turdagi yengil transportlar mamlakat hududiga olib kirildi.
Avtomobil yetkazib beruvchi davlatlar orasida Xitoy yaqqol yetakchilik qilmoqda – jami import qilingan mashinalarning 63 039 donasi aynan ushbu mamlakat hissasiga to‘g‘ri keldi. Qolgan o‘rinlarni AQSH (765 dona), Janubiy Koreya (737 dona) va Yaponiya (345 dona) egallagan bo‘lsa, boshqa mamlakatlardan jami 990 dona avtomobil keltirilgan.
