O‘zbekistonda xorijiy sarmoyali korxonalar soni 21 yarim mingga yaqinlashdi
Xorijiy kapital ulushi mavjud bo‘lgan subyektlarning asosiy qismi savdo va sanoat tarmoqlarida jamlangan. Xususan, eng yuqori ko‘rsatkich savdo sohasiga to‘g‘ri kelib, unda 7 637 ta korxona ish olib bormoqda. Sanoat yo‘nalishida esa 4 177 ta xorijiy sarmoyali subyekt ro‘yxatga olingan.
Shuningdek, axborot va aloqa texnologiyalari sohasida 1 840 ta hamda qurilish tarmog‘ida 1 769 ta xorijiy korxona faoliyat yuritmoqda. Xizmat ko‘rsatish yo‘nalishlaridan yashash va ovqatlanish sohasida 945 ta, transport va logistika yo‘nalishida esa 665 ta subyekt faoliyat olib bormoqda.
Qishloq, o‘rmon va baliqchilik xo‘jaligida 541 ta, sog‘liqni saqlash hamda ijtimoiy xizmatlar ko‘rsatish sohasida 247 ta xorijiy sarmoyadorlar ishtirokidagi korxona mavjud. Iqtisodiyotning boshqa turli yo‘nalishlariga esa jami 3 669 ta xorijiy kapitalga ega korxonalar to‘g‘ri keladi.
