O‘zbekistonda ipoteka kreditlari ajratilishi keskin ko‘payib, choraklik ko‘rsatkich 48 foizlik o‘sishni qayd etdi
Ko‘chmas mulk oldi-sotdi bitimlari soni ikkinchi chorakda 74,4 mingtani tashkil etib, o‘tgan yilgi darajasini saqlab qoldi. Aprel-may oylarida kuzatilgan vaqtinchalik sustlashuv aprel oyidan eskrou tizimi yo‘lga qo‘yilgani sababli ko‘plab bitimlar mart oyida oldindan rasmiylashtirilgani bilan izohlandi, biroq iyun oyiga kelib bozor dinamikasi qayta tiklandi.
Uy-joy narxlarida ham barqaror o‘sish kuzatildi: iyun holatiga ko‘ra, birlamchi va ikkilamchi bozorda xonadonlar narxi so‘mda o‘rtacha 6,2-6,3 foizga, dollar hisobida esa 12 foizdan ko‘proqqa qimmatlashdi. Yarim yil davomida 7,7 million kvadrat metr turar joy foydalanishga topshirilib, sohada qurilish hajmiga 27,3 trillion so‘mlik investitsiya kiritildi.
Poytaxtda uy-joy ijarasining o‘rtacha taklif narxi bir kvadrat metr uchun 9,5 dollarni tashkil etgan holda yillik hisobda oshgani qayd etildi. Shuning bilan birga, Toshkent shahrida yer narxlari o‘tgan yilgiga nisbatan 9 foizga arzonlashib, 100 kvadrat metr uchun o‘rtacha 292 million so‘m darajasida shakllandi.
