O‘zbekistonda boquvchisini yo‘qotganlik pensiyasi murojaatsiz tayinlanadi
O‘zbekistonda 2027-yil 1-yanvardan boquvchisini yo‘qotganlik pensiyasi fuqarolarning murojaatisiz tayinlanadi. Bu pezidentning 2026-yil 28-sentabrda qabul qilgan “Davlat pensiya ta’minotiga oid zamonaviy xizmatlarni joriy etishning qo‘shimcha chora-tadbirlari to‘g‘risida”gi PQ–355-son qarorida belgilandi.
Qarorga ko‘ra, 2026-yil 1-noyabrdan ayrim toifadagi shaxslarga umumiy belgilangan yoshdan ikki yil oldin yoshga doir pensiya proaktiv shaklda, ya’ni murojaat talab etilmasdan tayinlanadi. 2027-yil 1-yanvardan boquvchisini yo‘qotganlik pensiyasini tayinlashda ham shu tartib joriy etiladi.
Shuningdek, fuqarolar imtiyozli shartlarda pensiya tayinlash, pensiyalarni qayta hisoblash hamda pensiyaning boshqa turiga o‘tish uchun Davlat xizmatlari markazlari yoki my.gov.uz portali orqali murojaat qilish imkoniga ega bo‘ladi.
2027-yil 1-yanvardan “Mening pensiyam” onlayn xizmati ishga tushiriladi. Shu kundan Pensiya jamg‘armasi tomonidan fuqarolardan qog‘oz shaklidagi hujjatlar va ma’lumotlarni qabul qilish amaliyoti bekor qilinadi.
