O‘zbekistonda ayrim ishdan bo‘shatilgan xodimlarga muddatidan oldin pensiya tayinlanishi mumkin
Mehnat shartnomasi ayrim asoslar bilan bekor qilingan, belgilangan yosh va ish stajiga ega fuqarolar muddatidan oldin yoshga doir pensiya tayinlash uchun murojaat qilishi mumkin. Tartib Vazirlar Mahkamasining 28-sentabrdagi 519-son qarori bilan tasdiqlangan ma’muriy reglamentda belgilandi.
Unga ko‘ra, 58 yoshdan 60 yoshgacha bo‘lgan, kamida 25 yillik umumiy ish stajiga ega erkaklar hamda 53 yoshdan 55 yoshgacha bo‘lgan, kamida 20 yillik ish stajiga ega ayollar Yagona interaktiv davlat xizmatlari portali orqali so‘rovnoma yuboradi. Arizaga mehnat shartnomasini bekor qilish haqidagi buyruq nusxasi, ish staji to‘liq raqamlashtirilmagan bo‘lsa, mehnat daftarchasi nusxasi ilova qilinadi.
Mahalliy mehnat organi hujjatlarni ikki ish kunida tekshiradi va ariza beruvchini ish qidirayotgan shaxs sifatida ro‘yxatga oladi. Unga uch oy davomida maqbul ish topish choralari ko‘riladi. Shu muddatda ish topilmasa, fuqaro ishsiz deb e’tirof etilib, muddatidan oldin pensiya tayinlash uchun taqdimnoma Pensiya jamg‘armasiga yuboriladi. Pensiya tayinlangach, ishsizlik nafaqasi to‘lovi keyingi oydan to‘xtatiladi. Davlat xizmati bepul.
