O‘zbekistonda 1-oktyabrdan ikki oylik tozalik aksiyasi start oladi
Hujjatga ko‘ra, 1-oktyabrdan e’tiboran barcha hududlarda yashil hududlar joylashuvini aniqlash, yerlarni tayyorlash hamda ko‘chat va butalar zaxirasini yaratish bo‘yicha tayyorgarlik ishlari yo‘lga qo‘yiladi. Bevosita ko‘chat ekish tadbirlari esa iqlim sharoitidan kelib chiqib: Qoraqalpog‘iston va Xorazmda 1-noyabrdan, Buxoro va Navoiyda 5-noyabrdan, vodiy, vohaning bir qismi va Toshkentda 10-noyabrdan, Surxondaryo hamda Qashqadaryoda esa 20-noyabrdan boshlanadi.
Bundan tashqari, 2027-yil 1-yanvardan e’tiboran "Yashil mahalla" loyihasi doirasida "Mahallani yashillashtirish" maxsus paketi amaliyotga joriy etiladi. Mazkur tashabbus doirasida har bir mahallaga O‘rmon agentligi tomonidan tajribali o‘rmonchi-murabbiylar biriktirilishi ko‘zda tutilgan.
Shuningdek, ekish ishlarini tizimli va to‘g‘ri tashkil etish maqsadida "Mahalla yettiligi" a’zolari har bir mavsum oldidan ushbu biriktirilgan o‘rmonchi-murabbiylar tomonidan maxsus qisqa o‘quv kurslarida o‘qitib boriladi.
