O‘zbekiston mahallalarining qariyb 99 foizi jamoat transporti bilan ta’minlangani aytildi
Transport vazirligining ma’lumot berishicha, transport xizmati yo‘lga qo‘yilmagan aholi maskanlari soni 2021-yildagi 1 118 tadan 111 taga qisqargan.
So‘nggi yillarda mamlakatda 1 037 ta yangi yo‘nalish ochilib, umumiy yo‘nalishlar soni 2 868 taga yetkazildi. Natijada kunlik yo‘lovchi oqimi 1,2 milliondan 2,6 million kishiga oshdi. Brutto-shartnoma tizimi joriy etilishi ortidan avtobuslarning qatnov oralig‘i 10-12 daqiqagacha, safar vaqti esa 30 daqiqagacha qisqardi.
Tizimni modernizatsiya qilish doirasida yo‘nalishlarga 3 500 ta yangi avtobus hamda 2 264 ta mikroavtobus chiqarildi. Shuningdek, Toshkent, Nukus va viloyat markazlarida brutto-shartnoma asosida ishlaydigan yo‘nalishlar soni 282 taga yetdi.
Yaqin yillarda ushbu tizimdagi yo‘nalishlar sonini 418 taga yetkazish va yana 2 300 ta yangi avtobus hamda 1 000 ta mikroavtobus xarid qilish rejalashtirilgan. Shu bilan birga, Toshkent metropoliteni uchun 14 ta yangi poyezd keltiriladi hamda brutto-shartnomadagi yo‘nalishlarda yo‘l haqini to‘liq naqd pulsiz shaklga o‘tkazish ko‘zda tutilgan.
