O‘zbekiston banklaridagi xorijiy valyutadagi depozitlar ulushi tarixdagi eng past ko‘rsatkichlardan biriga tushib, 19 foizni tashkil etdi
Bir yil ichida jami depozitlar hajmi 34 foizga oshib, 482,7 trillion so‘mga yetgan. Bunda so‘mdagi jamg‘armalar 42,6 foizga ko‘paygani holda, valyutadagi omonatlar o‘sishi atigi 6,6 foizni tashkil etdi va natijada valyutaviy depozitlar ulushi 24 foizdan 19 foizga qisqardi.
Regulyator so‘mdagi jamg‘armalarga bo‘lgan talabning ortishini ijobiy real foiz stavkalari hamda milliy valyutaga nisbatan ishonchning yuksalishi bilan izohlamoqda. Biroq kredit portfelida dedollarizatsiya darajasi ancha sekin o‘zgarmoqda: valyutadagi kreditlar ulushi bir yil davomida atigi bir foizga kamayib, 39 foiz darajasida saqlanib qoldi. MB buni banklarning tashqi moliyalashtirish manbalari va valyuta xatarlari bilan bog‘lamoqda.
Omonatlarning muddatli tuzilmasida esa qisqa muddatli resurslar ulushi ortgani kuzatildi. Bir yilgacha bo‘lgan depozitlar ulushi 36 foizga yetgan bo‘lsa, uzoq muddatli jamg‘armalar ulushi 34 foizgacha kamaygan. Raqamlarga ko‘ra, jismoniy shaxslar banklarda 185,2 trillion so‘m mablag‘ saqlamoqda va resurslarning asosiy qismi – ya’ni to‘rtdan uch qismidan ko‘prog‘i Toshkent shahri hissasiga to‘g‘ri keladi.
