O‘zbekiston asosiy shaxmat terma jamoasi Armanistonni yirik hisobda mag‘lub etib, Butunjahon shaxmat olimpiadasidagi peshqadamligini yanada mustahkamladi
O‘yin davomida asosiy taxtalarda harakat qilgan Nodirbek Abdusattorov, Javohir Sindorov va Muhiddin Madaminov o‘z raqiblarini taslim etgan bo‘lsa, Nodirbek Yoqubboyev durang natijani qayd etdi. Abdusattorov Haik Martirosyanni, Sindorov Robert Hovhannisyanni, Madaminov esa Gabriel Sargisyanni mag‘lubiyatga uchratdi. Ushbu muvaffaqiyatdan so‘ng birinchi terma jamoa ochkolar sonini 18 taga yetkazib, turnir jadvalida yakkahokimlikni saqlab qoldi.
O‘zbekistonning ikkinchi jamoasi esa amaldagi chempion Hindiston terma jamoasiga 0,5:3,5 hisobida imkoniyatni boy berib qo‘ydi. Tarkibda faqat Abdimalik Abdisalimov Arjun Erigaisi bilan durang o‘ynadi, qolgan barcha taxtalarda hindistonlik shaxmatchilar zafar quchdi. Mazkur mag‘lubiyat sababli O‘zbekiston-2 terma jamoasi 15 ochko bilan umumiy jadvalda 3-o‘rindan 10-pog‘onaga pastladi.
Shuningdek, musobaqada ishtirok etayotgan uchinchi jamoa Isroil terma jamoasi bilan kechgan bahsda 1,5:2,5 hisobida mag‘lubiyatga uchradi. Ushbu jamoa tarkibida Muhammadali Abdurahmonov g‘alaba qozondi hamda Almas Rahmatullayev durang o‘ynadi. Hozirda O‘zbekiston-3 terma jamoasi 11 ochko to‘plagan holda 74-o‘rinni egallab turibdi.
