“O‘zagrolizing” AJ sobiq rahbari Nodir Otajonov Xitoydan eski kombaynlarni olib kirish mojarosi ortidan 6 yilga qamaldi
Sud materiallariga ko‘ra, Otajonov 2024-yilda Xitoy kompaniyasi vakillari bilan ilgari foydalanilgan 100 ta paxta terish kombaynini qayta ta’mirlab, yangi texnika sifatida O‘zbekistonga olib kirish bo‘yicha og‘zaki kelishuvga erishgan. Har bir kombayn narxi 80 ming dollar etib belgilangan 8 million dollarlik shartnoma evaziga “O‘zagrolizing” sobiq rahbari bitim summasining 15 foizini – jami 1 million 180 ming dollarni vositachi tarjimon orqali ulush sifatida olgan.
Olib kirilgan texnikalar aslida 2019–2020-yillarda ishlab chiqarilgani hamda ularni yangi sifatida hujjatlashtirish orqali 7,5 milliard so‘mlik bojxona to‘lovlari to‘lanmagani aniqlangan. Garchi sudlanuvchilar o‘z ayblarini tan olmasdan, shartnoma va bojxona rasmiylashtiruvlariga aloqasi yo‘qligini hamda davlat mablag‘lari sarflanmaganini ta’kidlashgan bo‘lsa-da, sud ularning vajlarini inkor etdi.
Jinoyat ishlari bo‘yicha Yunusobod tuman sudi hukmi bilan Nodir Otajonov O‘zbekiston manfaatlariga xilof bitimlar tuzish va bojxona qonunchiligini buzishda aybli topilib, 6 yilga ozodlikdan mahrum qilindi hamda unga 206,25 million so‘m jarima va 3 yil davomida moddiy javobgar lavozimlarni egallash taqiqi belgilandi.
Uning sherigi Haydar Abdushukurov esa 5 yilga qamaldi. Toshkent shahar sudi apellyatsiya instansiyasi mazkur jazo muddatlarini o‘zgarishsiz qoldirdi.
