Ohangarondagi bog‘chada 3 yoshli bola hasharotlarga qarshi vositani ichib, vafot etdi
Ohangaron shahridagi 6-sonli bog‘chada 2023-yilda tug‘ilgan bola oshxonada hasharotlarga qarshi ishlatiladigan vositani ichib qo‘yib, vafot etdi. Bu haqda Toshkent viloyati Maktabgacha va maktab ta’limi boshqarmasi rasmiy munosabat bildirdi.
Ma’lum qilinishicha, hodisa 2026-yil 28-avgust kuni yuz bergan. Tarbiyalanuvchi BSM vositasini ichib qo‘ygach, zudlik bilan Ohangaron shahar tibbiyot birlashmasiga olib borilgan. Biroq shifokorlar uning hayotini saqlab qola olmagan.
Dastlabki ma’lumotlarga ko‘ra, bolaning buvisi mazkur bog‘cha oshxonasida autsorsing tashkiloti xodimi sifatida oshpaz bo‘lib ishlagan. Hodisa bola buvisining yoniga — oshxonaga kirgan vaqtda sodir bo‘lgani aytilmoqda. Boshqarma yakuniy xulosa tergov va surishtiruv natijalari asosida berilishini ta’kidlagan.
Hozirda bolaning oshxonaga qanday kirgani, xavfli vosita nega uning qo‘li yetadigan joyda saqlangani hamda bunga kim mas’ul bo‘lgani o‘rganilmoqda. Tergov davom etmoqda, aybdorligi aniqlangan shaxslarga nisbatan qonun doirasida chora ko‘rilishi bildirilgan.
