Milliy kutubxona ortidagi 1,3 gektar hududda parkovka qurish bo‘yicha ekologik xulosa berilmagani ma’lum bo‘ldi
Ijtimoiy tarmoqlarda poytaxt markazidagi 1,3 gektarlik maydonda parkovka barpo etilishi xabari ortidan qo‘mita o‘z rasmiy munosabatini e’lon qildi. Idoraga ko‘ra, belgilangan tartibda ekologik baholashdan o‘tkazilmasdan turib, hududda daraxtlar, yashil maydonlar hamda tuproq qoplamiga ta’sir ko‘rsatadigan har qanday qurilish va obodonlashtirish ishlarini boshlash taqiqlanadi.
Garchi loyiha doirasida 1 mingdan ziyod yangi daraxt va buta ekilishi rejalashtirilgan bo‘lsa-da, mutasaddilar bu ko‘chatlar Yillar davomida shakllangan ko‘p yillik daraxtlar o‘rnini hamda ularning iqlimiy va rekreatsion ahamiyatini to‘liq bosa olmasligini uqtirishmoqda. Shu bois, mavjud yashil makon va dov-daraxtlarni maksimal darajada saqlab qolish asosiy shart sifatida ko‘rilmoqda.
Ekologiya qo‘mitasi hududdagi barcha daraxtlarni to‘liq xatlovdan o‘tkazish hamda barcha loyiha hujjatlarini majburiy tartibda ekologik ekspertizadan o‘tkazish shartligini ta’kidladi. Avvalroq mazkur hududda piyodalar yo‘lagi va daraxtlarga zarar yetkazmagan holda avtoturargoh barpo etilishi haqida xabar berilgan edi.
