Hafta o‘rtasida O‘zbekistonda yomg‘ir yog‘ib, havo salqinlashadi
O‘zg‘idromet resbulikada hafta davomida qanday ob-havo kuzatilishini e'lon qildi. Unga ko‘ra, 30-sentabr va 1-oktabr kunlari mamlakatning aksariyat hududlarida yomg‘ir yog‘ishi kutilmoqda. Kunduzgi harorat 21–24 darajagacha pasayadi, baland tog‘larda esa yomg‘ir qorga aylanishi mumkin.
O‘zgidrometning 28-sentabr — 2-oktabr kunlari uchun prognoziga ko‘ra, haftaning dastlabki ikki kunida O‘zbekistonning katta qismida quruq va iliq ob-havo saqlanadi. Havo biroz bulutli, ayrim joylarda o‘zgaruvchan bo‘ladi.
Faqat Toshkent viloyatida 28-sentabr kechqurun va 29-sentabrga o‘tar kechasi ayrim joylarda qisqa muddatli yomg‘ir yog‘ishi, momaqaldiroq bo‘lishi mumkin. Harorat kunduzi asosan 25–28, kechasi 10–13 darajani tashkil etadi.
30-sentabr va 1-oktabrda Qoraqalpog‘iston Respublikasi hamda Xorazm viloyatidan tashqari hududlarda ba’zi joylarda yomg‘ir yog‘adi, momaqaldiroq bo‘lishi mumkin. 2-oktabrda yog‘ingarchilik kutilmaydi. Bu kunlarda harorat kechasi 8–13, kunduzi 21–24, ayrim joylarda 26 darajagacha bo‘ladi.
Tog‘oldi va tog‘li hududlarda hafta davomida vaqti-vaqti bilan yomg‘ir yog‘adi. 30-sentabr va 1-oktabrda ayrim joylarda kuchli yomg‘ir kutilmoqda, baland tog‘larda esa yog‘ingarchilik qorga aylanishi mumkin.
Respublika bo‘ylab shamol sharqdan g‘arbga yo‘nalishini o‘zgartirib, soniyasiga 7–12 metr tezlikda esadi. Cho‘l hududlari va janubda ayrim joylarda uning tezligi soniyasiga 14 metrgacha kuchayishi mumkin.
Toshkentda qanday ob-havo kutilmoqda?
Poytaxtda 28-sentabr kechqurun va 29-sentabrga o‘tar kechasi qisqa muddatli yomg‘ir yog‘ishi, momaqaldiroq bo‘lishi mumkin. Harorat kechasi 10–13, kunduzi 25–28 daraja bo‘ladi.
30-sentabr va 1-oktabrda vaqti-vaqti bilan yomg‘ir yog‘ishi, momaqaldiroq bo‘lishi kutilmoqda. 2-oktabrda yog‘ingarchilik bo‘lmaydi. Harorat kechasi 10–13, kunduzi 21–24 darajani tashkil etadi. Shamol sharqdan soniyasiga 3–8 metr tezlikda esadi.
