G‘azoda urush qurbonlari soni 74 mingga yaqinlashdi, vayronalar ostida minglab odamlar qolmoqda
Vazirlik xabarida ta’kidlanishicha, minglab falastinliklar hanuz vayron bo‘lgan binolar qoldiqlari ostida qolmoqda, shu sababli yakuniy qurbonlar soni keskin ortishi kutilmoqda. Maks Plank demografik tadqiqotlar instituti hisob-kitoblariga ko‘ra esa, harbiy amaliyotlarning dastlabki ikki yilida hududda 100 mingga yaqin tinch aholi va fuqarolar halok bo‘lgan bo‘lishi mumkin. Isroil Qurolli kuchlarining G‘azo sektoriga qarshi keng ko‘lamli harbiy harakatlari 2023-yilning 8-oktyabridan buyon to‘xtovsiz davom etmoqda.
Shuningdek, Al Jazeera ma’lumotiga ko‘ra, G‘azo shahrining Shayx Radvan hududidagi gavjum bozor yaqinida drondan berilgan zarba oqibatida avtomobil portlatib yuborilgan. Taxminan yarim soat davomida yonib turgan transport vositasidagi jarohatlanganlar shifoxonalarga yetkazilgan. Dastlabki taxminlarga ko‘ra, zarba nishonida qochqinlar lagerlariga yordam ko‘rsatib kelgan gumanitar soha faoli bo‘lgan bo‘lishi mumkin, biroq uning shaxsi hali rasman tasdiqlanmadi.
Sektorning boshqa hududlarida ham harbiy to‘qnashuvlar va ushlanishlar qayd etilmoqda. Jumladan, Tuffah hududida bir falastinlik otishma natijasida og‘ir yaralangan bo‘lsa, Iordan daryosining g‘arbiy sohili – Baytlahm yaqinidagi Battir shahrida Isroil harbiylari sayrga chiqqan bir guruh ayollar, bolalar va keksalar hamda ularni olib kelgan avtobus haydovchisini ushlab ketgan.
- #G‘azo
- #vayronalar
- #qurbonlar
- #Falastin
- #Isroil
