Fransiya O‘zbekistondagi 11 ta yirik loyihaga 1,1 milliard yevrodan ortiq sarmoya kiritishni rejalashtirmoqda
Toshkentda o‘tkazilgan yettinchi yillik maslahatlashuvlarda energetika va transport infratuzilmasini modernizatsiya qilish, shaharlarni rivojlantirish hamda "yashil" iqtisodiyotga o‘tish masalalari muhokama qilindi. Ular orasida Toshkent – Samarqand temir yo‘l liniyasini rekonstruksiya qilish hamda poytaxt jamoat transporti tizimini tubdan yaxshilash loyihalari eng muhim yo‘nalishlar sifatida ajratib ko‘rsatilgan.
Bunga parallel ravishda, umumiy qiymati 604,2 million yevrolik yana to‘qqizta amaliy loyihani tayyorlash ishlari davom etmoqda. Tomonlar Qashqadaryo viloyatida ichimlik suvi ta’minotini yaxshilash, Qoraqalpog‘istondagi Suenli kanalini rekonstruksiya qilish, Orolbo‘yi hududini rivojlantirish va issiqlik tarmoqlarini yangilash bo‘yicha ishlarni jadallashtirishga kelishib olgan.
Ma’lumot uchun, Fransiya taraqqiyot agentligi 2015-yildan buyon faoliyat yuritib, shu kunga qadar 1,6 milliard yevroga teng 17 ta loyihani ma’qullagan. Hozirda amaldagi bitimlar bo‘yicha to‘lovlar 78 foizga yetgan bo‘lib, kelgusi yillik maslahatlashuvlarni Fransiyada o‘tkazish rejalashtirilgan.
