Elektropoyezdga chipta xarid qilish uchun mobil ilova ishga tushirildi
Shahar atrofi poyezdlarida qatnovchi yo‘lovchilar uchun “ElektroPoyezd” mobil ilovasi ishlab chiqildi. Bu haqda “O‘ztemiryo‘lyo‘lovchi” AJ matbuot xizmati xabar berdi.
Ma’lum qilinishicha, ilovada jo‘nash va borish manzillari hamda safar sanasini kiritib, kerakli poyezdni qidirish imkoniyati mavjud. Shuningdek, yo‘lovchilar yo‘nalishlarni ko‘rib chiqishi va poyezdlar qatnov jadvali haqida ma’lumot olishi mumkin.
Ilova orqali xarid qilingan elektron chiptalarda QR-kod bo‘ladi. Uni internetga ulanmasdan ham nazoratchiga ko‘rsatish mumkin. Shuningdek, ilova orqali bir oydan bir yilgacha bo‘lgan muddatga abonement xarid qilish imkoniyati mavjud.
Taqdim etilgan ilova tasvirida yo‘nalishlar, jadval, chipta tarixi va sozlamalar bo‘limlari ko‘rsatilgan. Ilova “Shahar atrofida yo‘lovchi tashish” MCHJ nomi bilan taqdim etilgan.
“ElektroPoyezd”ni Android qurilmalari uchun Google Play, iOS qurilmalari uchun esa App Store orqali yuklab olish mumkin.
