Buxoroda Somoniylar davriga oid noyob ganch panel qoldiqlari topildi
Buxoro shahridagi Shahriston arxeologik yodgorligida Somoniylar davriga oid jome masjidining me’moriy bezaklariga mansub, kufiy yozuvlar tushirilgan ganch panel qoldiqlari aniqlandi. Bu haqda Madaniy meros agentligi xabar berdi.
Ma’lumotlarga ko‘ra, O‘zbekiston–AQSh xalqaro arxeologik ekspeditsiyasi tomonidan olib borilayotgan tadqiqotlar davomida aniqlangan. Shuningdek, tadqiqotlarda O‘zbekiston va AQSh mutaxassislari bilan bir qatorda Rossiya va Eron arxeologlari, rassomlar, chizmachilar hamda “Buxoro” davlat muzey-qo‘riqxonasi xodimlari ishtirok etmoqda.
Ekspeditsiya rahbari Jamoliddin Mirzaxmedovning ta’kidlashicha, aniqlangan ganch panel qoldiqlari bizgacha to‘liq va yaxshi saqlangan holatda yetib kelmagan. Shu bois topilmani saqlab qolish maqsadida mutaxassislar tomonidan restavratsiya va konservatsiya ishlari olib borilmoqda. Mazkur topilma Buxoroning Somoniylar davri me’morchiligi, xususan, ganch o‘ymakorligi va epigrafik bezak an’analarini o‘rganishda muhim ilmiy manba sifatida ahamiyatga ega.
“Hozirda Shahriston arxeologik yodgorligida arxeologik tadqiqotlar bilan bir qatorda aniqlangan me’moriy ganch bezaklarini mustahkamlash, konservatsiya qilish va ilmiy jihatdan o‘rganish ishlari davom ettirilmoqda”, — deyiladi agentlik xabarida.
