Aripovga bolalarni zo‘ravonlikdan himoya qilish bo‘yicha senator so‘rovi yuborildi

Senator bosh vazirdan zo‘ravonlik bilan bog‘liq jinoyat sodir etgan shaxslar reyestrining yuritilishi, undan amalda foydalanilishi va mavjud muammolarni bartaraf etish choralari haqida ma’lumot so‘ragan.

So‘rovda, avvalo, sog‘liqqa, jinsiy erkinlikka, oilaga, yoshlarga va axloqqa qarshi jinoyat sodir etgan shaxslarga oid maxsus reyestrning amaldagi holati hamda undan amaliyotda foydalanish darajasini ma’lum qilish so‘ralgan. Shuningdek, voyaga yetmaganlar bilan ishlaydigan davlat organlari va tashkilotlar reyestr ma’lumotlarini olish uchun qancha so‘rov yuborgani va bu so‘rovlar qanday natija bergani yuzasidan axborot so‘ralgan.

Senator reyestrga kiritilgan shaxslarning mehnat faoliyati bilan bog‘liq masalalarga ham aniqlik kiritishni so‘ragan. Bundan tashqari, aniqlangan tizimli muammolarni bartaraf etish va bolalarni zo‘ravonlikdan himoya qilish mexanizmlarini kuchaytirish uchun ko‘rilayotgan choralar yuzasidan asoslantirilgan tushuntirish berish so‘ralgan.

Qonunchilikda bolalarni himoya qilish bo‘yicha bir qator talablar belgilangan. Jumladan, 2023-yil 11-aprelda qabul qilingan qonunga muvofiq, ayrim toifadagi shaxslarning ta’lim, tarbiya, bolalarni sog‘lomlashtirish, sport va ijodiy tashkilotlarda ishlashi hamda bolalar bilan bevosita ishlashni nazarda tutuvchi faoliyat bilan shug‘ullanishi taqiqlangan. Ushbu shaxslarning reyestrini shakllantirish va yuritish tartibi ham belgilangan.

Prezidentning 2026-yil 3-martdagi PF-33-son farmoni bilan tasdiqlangan “Yo‘l xaritasi”da esa maxsus reyestrni yuritish tizimini takomillashtirish, reyestrga kiritilgan shaxslarni monitoring qilish va voyaga yetmaganlar bilan ishlaydigan tashkilotlarga undagi ma’lumotlardan foydalanish imkoniyatini yaratish vazifalari ko‘rsatilgan. Rasmiy xabarda amaliyotda, jumladan, reyestr ma’lumotlaridan foydalanish va tegishli nazorat mexanizmlarini qo‘llash bo‘yicha masalalar mavjudligi qayd etilgan.