AQSH Davlat kotibi Marko Rubio boshchiligidagi yirik delegatsiya Samarqandga yetib keldi
Yuqori martabali mehmonni Samarqand xalqaro aeroportida O‘zbekiston Prezdenti Administratsiyasi rahbari Saida Mirziyoyeva va Tashqi ishlar vaziri Baxtiyor Saidov kutib oldi.
Shuningdek, kutib olish marosimida AQSH Prezidentining maxsus vakili Serjio Gor hamda ushbu mamlakatning O‘zbekistondagi elchisi Jonatan Henik ishtirok etdi. Marko Rubio ushbu tashrif doirasida 200 dan ortiq biznes vakillarini o‘z ichiga olgan AQSH tijorat delegatsiyasiga shaxsan boshchilik qilmoqda.
“Ushbu diplomatik platforma mintaqaviy bog‘liqlikni, o‘zgartiruvchi tijorat diplomatiyasi tashabbuslarini hamda Qo‘shma Shtatlar va Markaziy Osiyodagi hamkorlarimiz uchun yanada tinch va farovon kelajakni ilgari suradi”, deb yozdi Rubio.
Tashrif dasturiga ko‘ra, AQSH Davlat kotibi Samarqandda “C5+1” formati doirasida Markaziy Osiyoning barcha mamlakatlari – O‘zbekiston, Qozog‘iston, Tojikiston, Turkmaniston hamda Qirg‘izistonning yuqori martabali rasmiylari bilan alohida ikki tomonlama muzokaralar o‘tkazadi.
Muloqotlar avvalida Marko Rubio region bilan hamkorlik Vashington uchun strategik ahamiyatga ega ekanini ta’kidlab o‘tgan. Samarqanddagi uchrashuvlarda savdo-iqtisodiy, sarmoyaviy hamda mintaqaviy xavfsizlik masalalari muhokama qilinishi kutilmoqda.
