5 mingdan ortiq kishi 1 kunda 39 tonna chiqindi yig‘di
Xalqaro va mahalliy tashkilotlar, hokimliklar hamda vazirliklar hamkorligida o‘tkazilgan ushbu ommaviy tadbirda 5 ming nafardan ortiq ekofaollar, yoshlar va soha xodimlari qatnashdi. Respublika bo‘yicha to‘plangan jami 39 tonnaga yaqin chiqindilar 45 ta maxsus texnika yordamida hududlardan olib chiqib ketilgan.
Aksiyaning markaziy bosqichi Toshkent viloyatining “Chimgan” tog‘li hududida bo‘lib o‘tdi va unda ishtirokchilar 9 ta jamoaga bo‘lingan holda tozalik bo‘yicha o‘zaro bellashgan. Natijalarga ko‘ra, 279 kg chiqindi to‘plagan Poligon direksiyasi jamoasi birinchi o‘rinni egallagan. Agrar universiteti hamda 172-sonli maktab vakillari mos ravishda keyingi o‘rinlarni band etishgan. Yolg‘iz Chimgan hududining o‘zidangina 822 kg chiqindi yig‘ib olingan.
Tadbir davomida Chiqindilarni boshqarish agentligi direktori o‘rinbosari Shuhrat Haydar BMTning “World cleanup day” global tarmog‘i orqali jonli efirga chiqib, O‘zbekistonning ushbu xalqaro harakatdagi faol ishtirokini namoyish etgan.
Mutasaddilar bu kabi eko-aksiyalar shunchaki bir kunlik tadbir bo‘lib qolmasdan, aholi o‘rtasida atrof-muhitni toza saqlash madaniyatini shakllantirish va chiqindilarni aylanma iqtisodiyotning bir qismiga aylantirishga xizmat qilishini ta’kidlab o‘tgan.
