38 yoshli tadbirkor Timur Turlov Xalqaro shaxmat federatsiyasi (FIDE)ning yangi prezidenti etib saylandi
Yashirin ovoz berish yo‘li bilan o‘tkazilgan saylovning ikkinchi bosqichida Timur Turlov 110 ta ovoz to‘plab, raqibi Vadim Rozenshteynni (85 ovoz) ortda qoldirdi. Birinchi bosqichda uchta nomzodlar juftligi ishtirok etdi va Turlovga birinchi urinishdayoq mutlaq g‘alaba qozonish uchun atigi bir ovoz yetmay qoldi. Hal qiluvchi bosqichda u ishonchli ustunlikka erishib, FIDE tarixidagi sakkizinchi prezidentga aylandi. U bilan bir juftlikda qatnashgan besh karra jahon chempioni, hindistonlik grossmeyster Vishvanatan Anand esa tashkilot prezidenti o‘rinbosari lavozimini egalladi.
Yangi saylangan FIDE rahbari to‘rt yillik muddat davomida tashkilotni boshqaradi. U o‘zining saylovoldi dasturida xalqaro shaxmat tizimini to‘liq raqamlashtirish, milliy federatsiyalarning moliyaviy barqarorligini ta’minlash, maktab shaxmatini ommalashtirish hamda rivojlanayotgan mamlakatlardagi sportchilarni qo‘llab-quvvatlashni ustuvor yo‘nalishlar sifatida ko‘rsatgan.
Timur Turlov Freedom Holding Corp. xalqaro moliyaviy kompaniyasi asoschisi hisoblanadi. U 2023-yildan beri Qozog‘iston shaxmat federatsiyasini, shuningdek, Xalqaro maktab shaxmati federatsiyasi hamda Turkiy shaxmat assotsiatsiyasini boshqarib kelayotgan edi.
Samarqanddagi ushbu ovoz berish natijasida dunyoning eng nufuzli sport federatsiyalaridan biriga ilk bor Markaziy Osiyo vakili rahbarlik qiladigan bo‘ldi.
