Yaponiyadagi musobaqada Janubiy Koreya jamoasiga Shimoliy Koreya madhiyasi qo‘yib berildi
Gifu shahridagi Green Stadium majmuasida Bangladeshga qarshi o‘yin oldidan saf tortgan Janubiy Koreya xokkeychilari kutilmaganda o‘zlarida taqiqlangan Shimoliy Koreya madhiyasini eshitib, sarosimada qolishgan. Stadion boshlovchisi yo‘l qo‘yilgan noqulay xatolik uchun darhol uzr so‘ragan va Janubiy Koreya terma jamoasiga tegishli davlat madhiyasini qayta qo‘ydirgan. Ruhga qilingan ushbu bosimga qaramay, Janubiy Koreya ushbu uchrashuvda Bangladeshni 5:0 hisobida tor-mor etgan.
Mazkur voqea ikki mamlakat o‘rtasidagi murakkab siyosiy munosabatlar fonida o‘ta nozik masala hisoblanadi. Zero, 1950–1953-yillardagi urush tinchlik shartnomasi bilan emas, faqat sulh bitimi bilan yakunlangani sababli har ikki Koreya texnik jihatdan hamon urush holatida va Janubiy Koreyada Shimoliy Koreya ramzlari, jumladan madhiyasi qonunan taqiqlangan. Osiyo o‘yinlari tashkiliy qo‘mitasi yuz bergan hodisa yuzasidan zudlik bilan rasmiy munosabat bildirmagan.
Shu bilan birga, Janubiy Koreya delegatsiyasi Yaponiyadagi musobaqaning boshqa tashkiliy kamchiliklaridan ham norozilik bildirmoqda. Jumladan, basketbolchilar joylashtirilgan xonalarning torligidan shikoyat qilgan bo‘lsa, transport bilan bog‘liq tartibsizliklar amaldagi chempion hisoblangan erkaklar futbol jamoasining mashg‘ulotlar jarayoniga xalaqit bergan.
- #Yaponiya
- #madhiya
- #Janubiy Koreya
- #KXDR
