Yangi Toshkent aeroporti hududidagi 7 ta qabriston boshqa joyga ko‘chiriladi
Vazirlar Mahkamasi qaroriga muvofiq, Quyi Chirchiq hamda O‘rta Chirchiq tumanlarida joylashgan musulmon, koreys va xristian qabristonlarini ko‘chirish yuzasidan chora-tadbirlar belgilandi. O‘zbekiston musulmonlari idorasi va mutasaddi idoralar xulosasiga ko‘ra, eksgumatsiya jarayonida topilgan suyak qoldiqlari ehtiyotkorlik bilan yig‘ilib, sanitariya-epidemiologiya va diniy urf-odatlarga to‘liq rioya qilingan holda belgilangan yangi qabristonlarga qayta dafn etiladi.
Quyi Chirchiq tumanidagi qabrlar “Shardara” hamda Sergeli MFYdagi qabristonga, O‘rta Chirchiq tumanidagilari esa “Zaynab ona” va “Taraqqiyot” MFYdagi maskanlarga ko‘chirilishi ko‘zda tutilgan.
Joylaridagi tuman hokimliklariga marhumlarning yaqinlari va mahalliy aholi o‘rtasida tushuntirish ishlarini olib borish va jarayonni diniy qoidalarga mos holda tashkil etish topshirildi. Qabristonlarni ko‘chirish, yer maydonlarini tayyorlash hamda qayta dafn qilish bilan bog‘liq barcha moliyaviy xarajatlar Yangi Toshkent xalqaro aeroportini barpo etayotgan xususiy sherik tomonidan to‘liq qoplanadi.
