Toshkentda jarima maydonchasidagi avtomobilni olib chiqish uchun elektron QR-kodli ruxsatnoma joriy etildi
Hukumat tomonidan tasdiqlangan nizomga muvofiq, ma’muriy huquqbuzarlik sodir etilgan taqdirda, avtomobilni jarima maydoniga joylashtirish to‘g‘risidagi ma’lumotlar maxsus “Jarima maydonchasi” moduli orqali vakolatli organlar va saqlash xizmatini ko‘rsatuvchi subyektlarga zudlik bilan yuboriladi. Haydovchini boshqaruvdan chetlashtirish talab etiladigan holatlarda transport vositasi faqat maxsus evakuator yoki manipulyator vositasida majburiy ravishda evakuatsiya qilinadi.
Ushlab turishga sabab bo‘lgan kamchiliklar to‘liq bartaraf etilgach, avtomobilni maydonchadan olib chiqish jarayoni ham to‘liq raqamlashtirilgan holda amalga oshiriladi. Mas’ul xodim tomonidan rasmiylashtirilgan elektron ruxsatnoma maxsus QR-kod bilan tasdiqlanib, bir ish kuni ichida haydovchi hamda mas’ul saqlash xizmatiga elektron tizim orqali jo‘natiladi, shuningdek avtomobil egasining telefoniga SMS-xabarnoma boradi.
Yangi tartibga ko‘ra, elektron shaklda va QR-kod bilan tasdiqlanmagan har qanday ruxsatnomalar o‘z kuchiga ega emas deb hisoblanadi va bunday hujjatlar bilan transport vositasini jarima maydonchasidan chiqarishga qat’iyan yo‘l qo‘yilmaydi.
