Toshkentda bank xodimlari mijozning omonatidagi 300 ming dollarni o‘mardi
Toshkent shahrida tijorat banklaridan birining mas’ul xodimlari mijozning omonatidagi 500 ming dollardan 300 ming dollarini qalbaki hujjatlar orqali o‘zlashtirgani aniqlandi. Bu haqda Bosh prokuratura huzuridagi Iqtisodiy jinoyatlarga qarshi kurashish departamenti xabar berdi.
Departamentning Sergeli tumani bo‘limi tomonidan o‘tkazilgan tergovga qadar tekshiruvda bankning mas’ul shaxslari fuqaro I.M. nomidan qalbaki ariza va boshqa hujjatlarni rasmiylashtirgani aniqlangan.
Ular ushbu hujjatlar orqali fuqaroning bankka omonat sifatida qo‘ygan 500 ming AQSH dollaridan 300 ming dollarini o‘zlashtirib, talon-toroj qilgan.
Mazkur holat yuzasidan Jinoyat kodeksining 167-moddasi (O‘zlashtirish yoki rastrata yo‘li bilan talon-toroj qilish) hamda 228-moddasi (Hujjatlarni qalbakilashtirish va ulardan foydalanish) bilan jinoyat ishi qo‘zg‘atilib, tergov harakatlari olib borilmoqda.
