Toshkent viloyatida prokuror yordamchisi 4700 dollar olayotganda ushlandi
Toshkent viloyatining Oqqo‘rg‘on tumanida prokuror yordamchisi fuqarodan 4700 AQSH dollari olayotgan vaqtda ushlandi. Bu haqda Davlat xavfsizlik xizmati xabar berdi.
Ma’lum qilinishicha, u fuqaroning avtomobil oldi-sotdisi bilan bog‘liq masalasini hal qilish va bankdan 600 mln so‘mlik imtiyozli kredit olishiga ko‘maklashish evaziga jami 12 ming dollar talab qilgan. DXX va Bosh prokuraturaning Shaxsiy xavfsizlik boshqarmasi o‘tkazgan tadbirda u so‘ralgan pulning bir qismini olayotganida ushlangan.
Tergovga qadar tekshiruvda prokuror yordamchisi avvalroq shu fuqarodan 1300 dollar olgani ham aniqlangan. Hozirda unga nisbatan jinoyat ishi qo‘zg‘atish chorasi ko‘rilmoqda.
