Terror tashkilotlarini moliyalashtirishda ayblanayotgan o‘zbekistonlik erkak Gruziyadan AQSHga ekstraditsiya qilindi
O‘zbekiston fuqarosi, shuningdek, naturalizatsiya orqali AQSH fuqaroligini olgan Davud Ansoriy 23-sentabr kuni terror tashkilotlarni moliyalashtirish mayblovi bilan Tbilisidan Nyu-Yorkka ekstraditsiya qilindi. Bu haqda AQSH Adliya vazirligining xabar berdi.
«Kozimjon Gafurov» va «Kozim» ismlari bilan ham tanilgan Ansoriy joriy yil avgustida Gruziyada qo‘lga olingan. U IShID va «Jabhat an-Nusra»ga moddiy yordam ko‘rsatish hamda shu maqsadda til biriktirish bo‘yicha ayblanmoqda. Ansoriyni 24-sentabr kuni Bruklindagi federal sudga olib kelish rejalashtirilgani bildirilgan.
Sud hujjatlariga ko‘ra, Ansoriy asosan Bruklinda faoliyat yuritgan, a’zolari o‘zaro «choyxona» deb atagan guruhga rahbarlik qilgan. Tergov talqinicha, guruh Suriyaga borib, terrorchi tashkilotlar safiga qo‘shilmoqchi bo‘lgan shaxslarning safar xarajatlarini qoplash uchun pul yig‘gan.
Ayblovda qayd etilishicha, to‘plangan mablag‘lar Suriyaga ketgan jangarilarning ortda qolgan oilalari, shuningdek, janglarda halok bo‘lganlarning bevalari va yaqinlarini qo‘llab-quvvatlashga ham sarflangan. Ansoriy va uning sheriklari 2013-yilda kamida uch kishining Suriyaga borishini moliyalashtirgani aytilmoqda. Ularning uchalasi ham u yerda halok bo‘lgan.
Vazirlik ma’lumotiga ko‘ra, Ansoriy 2016-yil may oyida sheriklaridan biri hibsga olinganidan besh kun o‘tib, AQSHdan Turkiyaga uchib ketgan. U bir tomonlama aviachiptani safardan bir kun oldin sotib olgan. Shundan buyon qidiruvda bo‘lgan Ansoriyga nisbatan 2021-yil noyabrida Bruklindagi federal katta hakamlar hay’ati ayblov xulosasini tasdiqlagan. Ish bo‘yicha tergovni Federal qidiruv byurosi boshqa huquqni muhofaza qiluvchi idoralar ko‘magida olib borgan. Ansoriyni hibsga olish va AQSHga topshirish jarayonida Gruziya prokuraturasi ham ishtirok etgan.
Ansoriyning aybi sudda isbotlansa, unga ko‘pi bilan 35 yil ozodlikdan mahrum qilish jazosi tayinlanishi mumkin.
