Shavkat Mirziyoyev Andijonda 15 million dollarlik xorijiy investitsiya hisobiga qurilgan texnikum bilan tanishdi
Ushbu ta’lim muassasasi to‘qimachilik, mashinasozlik hamda elektrotexnika kabi yuqori texnologiyali sohalar uchun zamonaviy kadrlar tayyorlashga mo‘ljallangan. Qiymati 15 million dollarga teng loyiha to‘liq xorijiy sarmoyalar hisobiga amalga oshirilib, 150 ta yangi ish o‘rni yaratilishini ta’minladi. To‘rt gektar maydonda qurilgan muassasa 5 ming o‘quvchiga mo‘ljallangan bo‘lib, kelgusida bu yerda laboratoriyalar, yotoqxona va sport majmualari barpo etilishi ko‘zda tutilgan.
Texnikumda dual ta’lim tizimi yo‘lga qo‘yilgan bo‘lib, o‘quvchilar nazariy bilimlarni auditoriyalarda egallash bilan birga, amaliyotni sanoat zonasidagi yirik ishlab chiqarish korxonalarida o‘taydilar. Bu yondashuv yoshlarga o‘qish jarayonining o‘zidayoq zamonaviy uskunalar va texnologik jarayonlar bilan yaqindan tanishib, tayyor mutaxassis bo‘lib yetishish imkonini beradi.
Joriy yilning iyun oyida faoliyatini boshlagan mazkur dargohda ayni paytda 210 nafar talaba tahsil olmoqda. Rejaga ko‘ra, 2030-yilga borib ta’lim yo‘nalishlari soni 20 taga yetkaziladi, yillik qabul hajmi esa 1 800 nafarni tashkil etib, umumiy o‘quvchilar soni 4 ming nafarga oshiriladi. Davlat rahbari tashrif davomida yoshlar hamda investorlar bilan muloqot qilib, mutaxassislar tayyorlash sifatini oshirish bo‘yicha o‘z tavsiyalarini berdi.
