Samarqanddagi Shaxmat olimpiadasiga bag‘ishlangan oltin va kumush tangalar muomalaga chiqariladi

Qayd etilishicha, tangalar “Ikki tanga — bir Registon” konsepsiyasi asosida yaratilgan tangalar yonma-yon qo‘yilganda Registon maydoni peshtoqining yaxlit tasvirini hosil qiladi. Nafis milliy naqshlar va shaxmat donalari esa xalqimizning birdamligi, zakovati va bunyodkorlik salohiyatini ifodalaydi.

Tangalarning aversida Samarqand shahridagi Tillakori madrasasining meʻmoriy elementlari tasvirlangan boʻlib, kompozitsiya shaxmat donalari bilan boyitilgan. Unda meʻmoriy shakllar bilan uygʻunlashgan shaxmat donalari silueti va geometrik naqshlar aks etgan. Mazkur elementlar strategik tafakkur, intellektual yetakchilik, jamoaviy birlik hamda sharqona meʻmoriy meros gʻoyalarini ifodalaydi.

Tangalarning revers tarafida Xalqaro shaxmat federatsiyasi (FIDE) logotipi markaziy element sifatida aks ettirilgan. Shuningdek, oltin tangada “O‘zbekiston Respublikasi Markaziy banki”, kumush tangada esa “Central Bank of the Republic of Uzbekistan” yozuvlari hamda nominal qiymati ko‘rsatilgan.

Har ikkala tanga 999,9 asillikdagi qimmatbaho metalldan tayyorlanadi. Ularning har biri 31,1 gramm og‘irlikda bo‘lib, nominal qiymati 100 ming so‘mni tashkil etadi. Dastlab oltin tangadan 100 dona, kumush tangadan esa 500 dona chiqarilishi rejalashtirilgan. Bozor talabi va kolleksionerlar qiziqishiga qarab, ularning tiraji keyinchalik oshirilishi mumkin.