Saida Mirziyoyeva O‘zbekiston kimlar tarafida ekanini aytdi
O‘zbekiston Prezidenti Administratsiyasi rahbari Saida Mirziyoyeva BMT Bosh Assambleyasining 81-sessiyasidagi nutqida mamlakat geosiyosiy keskinlik sharoitida qanday yo‘lni tanlaganini tushuntirdi. Uning aytishicha, O‘zbekistonning tanlovi — inson qadri, ochiqlik va muloqot.
«Biz mamlakatlar oldiga “qaysi tarafni tanlaysiz?” degan savol qo‘yilayotganini ko‘ryapmiz. O‘zbekistonning javobi aniq. Bizning tanlovimiz — inson qadri. Biz ta’lim olishga, kasb egallashga va o‘z kelajagini o‘zi belgilashga intilayotgan yoshlarni tanlaymiz», — dedi Mirziyoyeva.
Uning ta’kidlashicha, mamlakat qudrati faqat harbiy yoki iqtisodiy salohiyat bilan emas, inson qadri, huquq va manfaatlarini qay darajada himoya qila olishi bilan ham belgilanadi. Shu sabab O‘zbekiston tinchlik, taraqqiyot va inson qadrini yagona vazifa sifatida ko‘radi.
Mirziyoyeva dunyoda urushlar davom etayotgani, geosiyosiy keskinlik va tengsizlik kuchayayotganiga e’tibor qaratdi. Uning so‘zlariga ko‘ra, Prezident Shavkat Mirziyoyev boshchiligidagi O‘zbekiston ochiqlikni, qo‘shnilar bilan yaxshi munosabatlarni va dunyo bilan muloqotni tanlagan. U tinchlikka intilishni kelajak uchun mas’uliyatni o‘z zimmasiga olish deb atadi.
Nutqda BMT faoliyatiga ham to‘xtalindi. Mirziyoyeva global muammolarni hech bir davlat yolg‘iz hal qila olmasligini aytib, qabul qilingan qarorlarni amalga oshirishga qodir va har bir mamlakatning ovozi eshitiladigan tashkilot zarurligini bildirdi. O‘zbekiston Bosh kotibning «BMT-80» tashabbusini hamda Xavfsizlik Kengashi tarkibini kengaytirishni qo‘llab-quvvatlashini ma’lum qildi.
Uning aytishicha, O‘zbekiston kelgusi yilda Qo‘shilmaslik harakatiga raislik qiladi va bundan muloqot uchun yangi maydonlar yaratishda foydalanmoqchi. Shuningdek, mamlakat 2035–2036-yillarda BMT Xavfsizlik Kengashining doimiy bo‘lmagan a’zosi bo‘lish uchun o‘z nomzodini ilgari surgan.
Mirziyoyeva Markaziy Osiyoda qo‘shni davlatlar o‘rtasidagi munosabatlar o‘zgarganini qayd etib, Afg‘oniston xalqini o‘z muammolari bilan yolg‘iz qoldirmaslikka chaqirdi. U O‘zbekistondagi islohotlar natijasini odamlar hayotidagi o‘zgarishlar bilan baholashini aytdi.
Nutqning boshqa qismlarida bolalar farovonligi, Orol dengizi hududidagi ekologik ishlar, suvni tejash, qayta tiklanuvchi energiya va sun’iy intellekt masalalari tilga olindi. Mirziyoyeva texnologik taraqqiyot inson huquqlari, xavfsizlik va teng imkoniyatlarga xizmat qilishi kerakligini ta’kidladi. U, shuningdek, ayollar huquqlari, oiladagi zo‘ravonlik uchun javobgarlik va madaniyatlararo muloqot haqida gapirdi.
«O‘zbekiston xalqi va Prezidenti tinchlik, ishonch va inson qadri ustuvor bo‘lgan dunyoni qurishga hissa qo‘shishga tayyor», — deya yakunladi u nutqini.
