QVZchi universitet rektori bo‘ldi
Yangi rektor tayinlovga qadar ushbu oliy ta’lim muassasining Yoshlar masalalari va ma’naviy-ma’rifiy ishlar bo‘yicha birinchi prorektori lavozimida faoliyat yuritib kelayotgan edi. U 1993-yilda tug‘ilgan bo‘lib, 2015-yilda Toshkent davlat agrar universiteti Nukus filialining bakalavriat, 2017-yilda esa Toshkent davlat agrar universitetining magistratura bosqichini tamomlagan.
Mutaxassisligi bo‘yicha agrokimyogar bo‘lgan Muxamedali Dauletmuratov qishloq xo‘jaligi fanlari bo‘yicha falsafa doktori (PhD) hamda dotsent ilmiy unvoniga ega. Ilmiy-pedagogik faoliyati davomida u “Umid uchquni” hamda “O‘zbekiston Respublikasi qishloq xo‘jaligi fidoyisi” ko‘krak nishonlari bilan taqdirlangan.
Sohadagi erishgan muvaffaqiyatlaridan tashqari, u keng jamoatchilik va yoshlar orasida Quvnoqlar va zukkolar assotsiatsiyasi doirasidagi “Yangi yulduzlar” hamda “Agrolife” jamoalaridagi faol chiqishlari orqali ham yaxshi tanilgan.
Avvalroq qiziqchi Shukurillo Isroilov Toshkent shahar madaniyat boshqarmasi boshlig‘i o‘rinbosari etib tayinlangan edi.
