Pedagoglarning OTMda o‘qiydigan har bir farzandiga kontrakt pulining 30 foizi qaytarib beriladi
Vazirlar Mahkamasining 501-sonli qarori bilan tasdiqlangan tartibga ko‘ra, imtiyoz yangi qabul qilingan va ayni paytda tahsil olayotgan talabalarga har yili qo‘llanadi. Oila a’zolari orasida bir nechta farzand davlat oliygohlarida shartnoma asosida o‘qiyotgan bo‘lsa, 30 foizlik chegirma ularning har biriga alohida ajratiladi. Jarayonni rasmiylashtirish uchun kontrakt.edu.uz platformasi orqali ariza topshiriladi va arizachining pedagog farzandi ekani idoralararo integratsiya tizimi orqali tasdiqlangach, chegirma 2 ish kuni ichida avtomatik ravishda bir o‘quv yili uchun bir marta rasmiylashtiriladi.
Ushbu moliyaviy yengillik nodavlat va xorijiy OTMlar, ularning filiallari, oliy harbiy ta’lim muassasalari hamda qo‘shma ta’lim dasturlarida tahsil olayotganlarga nisbatan tatbiq etilmaydi. Shuningdek, super-kontrakt asosida kirgan talabalar ham chegirmadan foydalana olmaydi.
Ota-onadan biri pedagogik faoliyatini tugatsa yoki uning ushbu toifasi bekor qilinsa, keyingi o‘quv yilidan e’tiboran talabaga ajratilgan chegirma amal qilishdan to‘xtaydi.
