“OzodNazar, men Sarvar Usmon”. Ozodlik radiosi sobiq jurnalisti O‘zbekistonda rasman “tan olindi”
Ijtimoiy tarmoq faoli va bloger Dima Qayum jurnalist Sarvar Usmonning O‘zbekiston Jurnalistlar uyushmasi faxriy a’zoligiga qabul qilinganini bildirib, uni ushbu e’tirof bilan tabriklagan. U o‘z sahifasida ko‘p yillar davomida jurnalist faoliyatiga nisbatan turli fikrlar bildirilganiga qaramay, uning ijodiy mehnatini hamisha hurmat qilib kelganini ta’kidladi.
“Ko‘p yillar siz haqingizda nimalar deyishmadi. Lekin men ularni fikriga qo‘shilmadim, sizni muxlisingiz bo‘lib qoldim va qolaveraman ham”, deb yozadi Dima Qayum.
Faol o‘z xabarida adolat qaror topganini va ushbu qaror uzoq kutilgan voqea bo‘lganini qayd etgan. Shuningdek, u jurnalistni Farg‘ona viloyatining Rishton tumanida kutib olishga tayyorgarlik ko‘rilayotganini ham qo‘shimcha qilgan.
Jurnalistlar uyushmasi tomonidan berilgan ushbu faxriy unvon Sarvar Usmonning sohadagi ko‘p yillik mehnati va media olamidagi faoliyatiga berilgan rasmiy e’tirof sifatida baholanmoqda.
Ma’lumot uchun, Sarvar Usmon ko‘p yillik tajribaga ega taniqli o‘zbek jurnalisti va media vakili. U uzoq yillar davomida "Ozodlik" radiosida faoliyat yuritib, tahliliy materiallar, mualliflik dasturlari hamda dolzarb ijtimoiy-siyosiy mavzularda “OzodNazar” kabi eshittirish va suhbatlarni olib borgani bilan jamoatchilikka yaxshi tanish.
