O‘zbekistonda Hindiston va Bangladeshdan talabalar qabul qilish taqiqlangani haqidagi xabarlar rad etildi
Vazirlik rasmiy axborotiga ko‘ra, mamlakat xalqaro ta’lim xizmatlari eksportini rivojlantirish va chet ellik talabalar oqimini oshirish borasidagi ishlarni izchil davom ettirmoqda. Har bir oliy o‘quv yurti xorijlik talabalar uchun qabul kvotalarini o‘quv auditoriyalari hajmi, yotoqxonalardagi o‘rinlar hamda professor-o‘qituvchilar salohiyatidan kelib chiqqan holda mustaqil shakllantiradi.
Chet ellik abituriyentlar uchun qabul jarayonlari mutlaqo bepul va onlayn tarzda “Study in Uzbekistan” yagona elektron platformasi orqali amalga oshiriladi. Mazkur tizimda barcha OTMlar, ta’lim yo‘nalishlari, qabul shartlari va to‘lov-kontrakt narxlari haqidagi ma’lumotlar ochiq joylashtirilgan. Shu munosabat bilan vazirlik bo‘lajak talabalarga pullik vositachilar xizmatidan foydalanmaslikni va hujjatlarni faqat rasmiy portal orqali topshirishni tavsiya qilmoqda.
Statistik ma’lumotlarga ko‘ra, bugungi kunda O‘zbekistonda tahsil olayotgan hamda muqim yashayotgan xorijliklar orasida Hindiston fuqarolari yetakchilik qilmoqda. Ayni paytda mamlakatimizda 13,3 ming nafardan ortiq hindistonlik istiqomat qilayotgan bo‘lsa, ularning asosiy qismini aynan OTM talabalari tashkil etadi.
