O‘zbekistonda elektr va gaz tariflarini belgilash jarayoni to‘liq avtomatlashtiriladi
Prezidentning PF–202-sonli farmoniga ko‘ra, Energetika vazirligi tomonidan korxonalar va iste’molchilarga shartnomaviy va xo‘jalik munosabatlari bo‘yicha berib kelingan yakka tartibdagi ruxsatnomalarga chek qo‘yildi. Shu bilan birga, Energetika bozorini rivojlantirish va tartibga solish agentligining vakolatlari sezilarli darajada kengaytirilib, unga elektr energiyasidan tashqari tabiiy va suyultirilgan gaz ta’minoti sohasida ham bosqichma-bosqich bozor mexanizmlarini joriy etish vazifasi yuklatildi.
Sohadagi nazorat tizimi ham tubdan o‘zgarmoqda: Elektr energiyasi, neft mahsulotlari va gazdan foydalanishni nazorat qilish inspeksiyasi faoliyatida asosiy e’tibor qoidabuzarliklarni jazolashga emas, balki xavflarni barvaqt aniqlash hamda ularning oldini olishga qaratilgan preventiv modelga qaratiladi. Tarmoq korxonalari esa xomashyoni qazib olishdan tortib sotishgacha bo‘lgan bosqichlarda o‘z xo‘jalik faoliyatini mustaqil amalga oshiradi.
Islohotlarning yana bir muhim bosqichi sifatida 2027-yil 1-iyuldan e’tiboran Idoralararo tarif komissiyasi uchun yoqilg‘i-energetika sohasining yagona raqamli platformasi ishga tushiriladi. Ushbu tizim orqali korxonalarning tarif bo‘yicha talabnomalari hamda zaruriy moliyaviy-texnik ma’lumotlar elektron tarzda qabul qilinib, tarif narxlari inson omilisiz, avtomatlashtirilgan dasturiy algoritm asosida hisoblab chiqiladi.
- #avtomatlashtirish
- #gaz
- #svet
- #tarif
